Darchini ke Fayde Benefits of Cinnamon

Darchini ke Fayde Benefits of Cinnamon

Health Tips Roman Hindi/Urdu

Janiye benefits of Cinnamon, isko Urdu mein Darchini kehte hein jiske fayde is page par beyan kiye gaye hein. Aap isko Daar Cheeni bhi keh sakte hein, jabke kai log isko Dalchini bhi kehte hein.

Yeh darasal aik darakht ki chhaal hoti hei. Isko garam masaleh ke taur par khano ko khush zayqa banane keliye istemal kiya jaata hei. Jabke hakeem hazraat iska istemal dawaiyo mein qadeem daur se karte aa rahe hein.

Yeh aik farhat bakhsh masalah hei. Mizaj ke lehaz Dalchini ki taseer garm aur khushk hoti hei, lekin iske sath Qaabiz bhi hoti hei. Zayqe ke lehaz se meethi aur khushbu dar hoti hei.

Dar chini ke Fayde Ya benefits of Cinnamon in Hindi/Urdu

Darchini cholesterol ko kam karne mein intehayi mosassir hei. Yeh khoon ki naaliyo mein ruki hui nuqsan deh chiknai ko nikal kar bilkul saaf kar deti hei. Jis se nasirf cholesterol normal ho jaata hei balke Diabetes ke marz mein bhi bohat fayda hota hei. Is maqsad keliye aap rozana darchini ke powder ki aadhi chamchi din mein 2 baar paani ke sath le sakte hein.

Janiye Anjeer ke fayde

Darchini Khansi aur Dama ke marz mein bohat mufeed hei. Iske liye iske powder ko brabar miqdar mein Shehed mein mila kar chaata jaye to fayda hota hei. Yeh saddo ko kholti hei aur Gas ke ikhraaj ko aasan banati hei. Bhook ki kami ko door karti hei.

Sardi ke mausam mein jab baar baar Peshab aata ho to aadha chamcha Darchini ka powder doodh ke sath khaya jaye to fayda hota hei. Jabke woh bache jo raat ko aksar peshab kar dete hein, unke liye yeh Totka aazmaiye. Cinnamon yani Darchini ka aik tukra doodh mein daal kar ubaaliye. Ab is tukre ko nikal kar yeh doodh bache ko pila dejiye to bohat afaaqa ho ga.

Agar Nazla ki shikayat ho to chaye banate waqt Darchini ko ubalte hue paani mein daal kar dam dejiye. Ab is chaye ko peene se aaram aa jaye gaa.

Pardhiye Kishmish health benefits

Darchini ka tail bhi nikala jaata hei. Iska mizaj bhi Garam aur khushk hota hei. Yeh dil aur dimagh ko farhat deta hei. Nizam e tanaffus ko mutaharrik karta hei. Mayda aur jigar ko taqat deta hai aur balgham ko bhi khaarij karta hei.

Kuch mazeed Darchini (Cinnamon) ke fayde

China ke mahireen ka dawa hei ke Darchini ke powder aur Shehed ki chaye peene waale log kabhi boordhe nahi hote. Iskeliye 1 cup pani mein 1 chamach Shehed aur 2 chutki Darchini ka powder daal kar isko ubaliye. Aur isko chaye ki tarah pejiye. Is chaye ke rozana istemal se jild ke cells jawan rehte hein aur jild mein dheela pan nahi aata. Umar barhne ke bawajood jawano jesi quwat qayim rehti hei.

Alsi ke fayde aur istemal

Darchini ke tail ko Nafs par bator Tilla istemal kiya jaye to yeh nafs ko taqat deta hei.

Gurdo ke dard ya Rehem ke dard ki soorat mein Cinnamon ke tail ke chand qatre doodh mein mila kar peene se aaram milta hei. Jabke dard ke maqam par iski maalish karna bhi mufeed hei.

Zehreele hashraat ke kaatne ki soorat mein Darchini ko pani mein pees kar kaatne waali jagha par laip kejiye. Bohat aaram mile ga.

Cashew benefits in Hindi Urdu

Nassyan yani bhoolne ke marz mein Darchini ka powder 2 maasha neem garam doodh mein milaiye. Subha aur sham 2 time isko dawa ke taur par pejiye. Is se na sirf Nassyan door ho ga balke mardana taqat mein bhi izafa ho ga.

Darchini ke Fayde ya Cinnamon benefits ko dekhte hue ham logo ko iska regular istemal karna chahiye.

Bawaseer Ka Ilaj or Parhez Janiye Yeh Kyun Hota hei

Bawaseer Ka Ilaj or Parhez Janiye Yeh Kyun Hota hei

Health Tips Roman Hindi/Urdu

Bawaseer ka ilaj or parhez jan-ne keliye yeh post aakhir tak parhiye. Pehle jaante hein ke yeh marz kya hei. Insan ke Maqad mein jo khoon ki ragein hoti hein un mein jab Sozish, Kharish, Wurm ya Chhaale se ban jayen to is kefiyat ko Bawaseer kaha jaata hei. Jab yeh marz hota hei to uski bohat si wajuhaat ho sakti hein. Yeh marz moroosi bhi ho sakta hei lekin dayemi Qabz iski sab se bari waja hei.

Qabz ke bayis jab Pakhana sakht ho jaata hei to usko khaarij karne mein mushkil paish aati hei. Yun zor lagane ki waja se maqad ki Rago par dabao parta hei. Aur in Rago mein sozish paida ho jaati hei.

Agar is moqa par ehtiyat na ki jaye aur yeh kefiyat musalsal rehne lage to Maqad ke ird gird Rago mein Khoon theher jaata hei. Jiski waja se ragein phool jaati hein. Aur masso ki shakal mein bahir nikal aati hein. Yaa ander hi ki taraf takleef dene lagti hein. Jabke yeh andar aur bahir dono taraf bhi ho sakti hein.

Mareez jab pakhana karne lagta hei to dabao pardne ki waja se yeh phat jaati hein. Aur in se Khoon behne lagta hei. Agar Pakhana ke sath khoon aata ho to Khooni Bawaseer aur agar Khoon na aye to Baadi Bawaseer kehlati hei.

Bawaseer ki alamat aur kon log is marz ka shikar ho sakte hein

Bawaseer ki alamat yeh hein. Maqad mein kharish ya jalan, Shadeed Qabz, Pakhana karte waqt ya uske baad khoon aana, Maqad ke maqam par phooli hui Rago ka mehsoos hona. Jabke Mayde mein Gas aur tezabiyat, bhook aur Neend mein kami, jismani kamzori, Kamar aur Joro mein dard aur tabiyat mein bezari bhi ho jaati hei.

Din bhar baith kar kaam karne wale log aur aksar Hamila khwateen Qabz ka shikar ho jaate hein. Jiski waja se Bawaseer ka marz ho sakta hei. Iske ilawa wazan ki ziyadti, Garm aur chatpate khane khaana aur Raisha daar ghiza ka kam istemal bhi iske asbab ho sakte hein. Jabke Zaeef log, Depression ke mareez, Diabetes aur jigar ke amraaz mein mubtila logo mein Bawaseer hone ke imkanat ziyada hote hein.

Bawaseer ka ilaj or parhez kuch karamad gharelu totke

Bawaseer ka ilaj ke liye Anjeer bohat mufeed hei. Iske istemal se purani se purani Bawaseer bhi khatam ho jaati hei. Yeh gas aur Qabz ka khatma karti hei aur khoon ki naliyo ko mazboot karti hei. Lekin iska istemal baqaydgi se aur lambe arse tak karna chahiye. Mukhtalif logo ko 4 se le kar 10 months tak ke arse mein mukammal shifa mil jaati hei.

Is ka tareeqa yeh hei ke, rozana subha khaali pait 1 glass Paani mein 1 table spoon Shehed ka mila kar peena shuru kar dein. Lekin is mashroob ko peene ke saath Anjeer ke 5 daane bhi iske saath khana zaroori hein. Yeh is marz ka shaafi ilaj hei.

2 Cup Gajar ke rus mein 1 cup Paalak ka rus mila kar rozana 3 hafte tak pejiye. Is se har qism ki Bawaseer khatam ho jaye gi.

20 gram Kaali Mirch, 200 gram Zeera aur 20 gram Misri lejiye. Ab in teeno ko mila kar Grinder mein pees kar kisi sheeshi mein rakh lejiye. Rozana is safoof ka 1 chamcha pani ke sath din mein 2 baar istemal kejiye. Yeh bhi aik aasan gharelu Bawaseer ka ilaj hei.

Ghizayi ahtiyat aur Parhez

Is marz ke ilaj keliye ghiza mein parhez bohat zaroori hei. Apne rozmarra ke khane peene ke mamool ko sahi karna bohat ehem hei. Ghiza hamesha apne muqarrar waqt par khayen. Pait bhar kar khaane se ijtanab karein. Raisha dar khurak ka istemal ziyada karein aur paani jitna ziyada ho sake pejiye. Iske ilawa taaza sabzi aur fruits ka istemal bhi ziyada kejiye.

Jabke Bara gosht, Anda, Taiz masalah daar khaane, tali hui ashiya, Chawal aur is se bani hui cheezein aur dabba band khurak bilkul tark kar dejiye. Doodh mein pani mila kar piya kejiye. Kache Nariyal ka pani bhi peete rahiye. Sakht jagha par baithne se gurez kejiye. Raat ko sone se pehle 1 chamcha Ispaghol ka chhilka doodh ke saath le liya kejiye.

Hamein ummeed hei ke Bawaseer ka ilaj or parhez se mutalliq yeh mazmoon aapke liye mufeed saabit ho ga.

Flax Seeds Benefits In Urdu | Alsi Ke Fayde Istemal Ka Tarika

Flax Seeds Benefits In Urdu | Alsi Ke Fayde Istemal Ka Tarika

Health Tips Roman Hindi/Urdu

Alsi ke fayde ya benefits of Flax Seeds jaaniye Urdu mein. Jaan kar aap hairan reh jayen ge. Jo log Alsi ko apni daily khurak ka hissa bana lete hein woh ziyada sehatmand hote hein. Iska istemal hazaro saal se kiya jaa raha hei. Zmana qadeem ki tibb ki kutub mein bhi iski shifa bakhsh qualities ka zikr milta hei.

Flax seeds (meaning in Urdu: Alsi ke beej) mein 30 se 40 % hissa tail ke ilawa Omega-3 fatty acid, Fiber aur protein khasi miqdar mein hotay hein. Jabke Vitamin B-1, B-2, Vitamin C, E, Carotene, Iron aur Zinc bhi paye jaate hein. Iske ilawa kuch miqdar mein Omega-6, Potassium, Phosphorus aur Calcium bhi maujood hote hein.

Alsi ki Taseer pehle darja mein Garam hoti hei. Iska Tail bhi istemal kiya jaata hei lekin Alsi ke beej istemal karna ziyada mufeed hein. Kiyuke yeh Tail jaldi kharab ho jaata hei isliye kam miqdar mein kharidye aur jaldi use kar lejiye. Iske ilawaa yeh bhi yaad rakhye ke is tail ko khana pakane keliye kabhi bhi use nahi karna chahiye.

Flax seeds benefits in Urdu, jaaniye Alsi ke Fayde

Alsi Cancer ko bardhne ya phailne se rokti hei. Is mein Ghair hal pazeer Raishe yani Phytoestrogens lignans bhi bhari miqdar mein hote hein. Yeh na sirf Jaraseem aur Virus ko door karte hein, balke Jism mein Rasoli yani Tumor bhi ban-ne nahi dete. Yeh Alsi ka aik bada benefit hei. Doctors ke khayal mein yeh Raishe Astrojen harmon ko Jism se nikal dete hein. Isi harmon ki waja se hi jism mein Tumors ki afzayish hoti hei. Yun jism mein Tumor nahi ban sakta aur agar pehle se Tumor mojood ho to woh bardhne nahi paata.

Janiye Akhrot Benefits

Alsi ya Flax seeds mein behtreen qism ka protein hota hei. Jo log kisi waja se Gosht ya Fish nahi kha sakte, woh Alsi ke beej kha liya karein. Is mein Omega-3 Fatty acid kaafi miqdar mein paya jaata hei. Yehi juz machli ke Tail mein bhi hota hei. Yeh khoon main thakke ban-ne se rokta hei. Cholesterol kam karta hei aur Dil aur Dimagh ki sehat keliye behtreen samjha jaata hei. Joro ke dard aur Dama ke marz mein bhi mufeed hei.

Flax seeds Diabetes yani Sugar ke marz mein bohat mufeed hein. Kiyuke yeh khoon mein shakar ki miqdar ko balance karne ki salahiyat rakhte hein.

Alsi mein maujood Fatty acids ghiza ke juzwe badan ban-ne ke amal ko taiz karte hein. Inki waja se jism mein se faaltu charbi ke pighalne mein madad milti hei. Jis se wazan kam hota hei.

Aalu Bukhara Ke Fayde parhiye

Yeh Qabz mein bhi faydamand hei. Kiyuke Flax seeds mein bohat ziyada Raisha aur Qudrati Luab hota hei. Iske daily istemal se haazma to taqat milti hei.

Haamila aur doodh pilane waali khwateen agar rozana aik tea spoon Flax seeds oil yani Alsi ka Tail pee liya karein, to bache ka dimagh taiz ho jaata hei. Aur agar school jaane waale bache is Tail ke 5 drops rozana pee lein, to woh saans ki beemariyo se mehfooz rehte hein.

1 tola Alsi ke beej Paani mein josh de kar pees lein aur pee lein. Kuch din tak yeh amal karte rahein to Masana ki pathri nikal jaati hei.

Alsi ke istemal ka tarika

Alsi ke beej yani Flax seeds ka chilka kaafi sakht hota hei. Agar isko baghair chabaye kha liya jaye, to hamara haazma isko hazam nahi kar paata. Aur yeh saalim hi kharij ho jaata hei. Isliye inko use karne ka behtreen tarika yeh hei ke inko pees kar khaya jaye.

Amla aur iske Juice ke Fayde

Aap Alsi khareed kar isko chhan kar aur saaf kar ke Fridge mein rakh dein. Rozana subha Khaali pait jitni zaroorat ho utni hi miqdar mein Flax seeds ko Grinder mein pees kar paani ke sath kha liya karein. Ya phir sirf aik hafte ki khurak ko pees kar air tight bottle mein daal kar fridge mein rakh lein.

Rozana aik chamach ka istemal kaafi hei. Aik hafte ke baad 2 chamach tak bardha dein. Istemal shuru karne ke 15 din ke baad se aapko is ke mufeed asraat mehsoos hone lagein ge. Lekin baaz logo ko 1 mahina bhi lag sakta hei. Lekin is amal ko jaari rakhna aapko bohat si beemariyo se bachaye rakhe ga.

Alsi ke fayde ya benefits of Flax seeds in Urdu jaan lene ke baad jab aap iska regular istemal karna shuru karo, to aik baat ka khas khayal rakhiye. Woh yeh ke aap ne apni daily routene se ziyada paani peena hei.

Amla Ke Fayde Khushk Amla Powder Ke Fawaid

Amla Ke Fayde Khushk Amla Powder Ke Fawaid

Health Tips Roman Hindi/Urdu

Amla Ke Fayde is mash-hoor qaul se sabit hote hein. Yani 'Amle ka khaya aur bazurgo ka kaha baad mein zahir hota hei'. Matlab yeh ke iske fayde baad mein saamne aate hein. Is gol shakal ke phal mein quwat aur tawanayi ka khazana chupa hua hei. Yeh beshumar amraz ke ilaj mein moassar hei.

Amla ki taseer sard, khushk aur Peshab aawar beyan ki gayi hei. Lekin yaad rakhiye ke khushk mizaj waale phal qaabiz hote hein. Iska zayqa tursh aur kaseela hota hei. Yeh aam tor par medicines mein ziyada use kiya jaata hei. Khas tor par hair Tonics mein iska istemal bohat ziyada hei. Jabke sabzi ke tor per use karne ke ilawa iska Achar aur Murabba bhi banaya jaata hei.

Amla ke ghizayi ajza

Taza Amla mein 80 % Paani, Protein, Vitamin B, C, Calcium, Iron aur Phosphorus achi miqdar mein paye jaate hein. Is mein doosre tamam phalo se ziyada miqdar mein Vitamin C paya jaata hei. Amla se ziyada fayda haasil karne ke liye zaroori hei ke isko namak ke sath kacha khaya jaye. Is tarah se is mein maujood Vitamin C aur doosre minerals zaiya nahi hote.

Amrood Ke Faide janiye

Is mein bhari miqdar mein paaya jaane waala iron juzwe badan ban jaane ki salahiyat rakhta hei. Deegar zariyo se jo Iron haasil hota hei woh haazme mein kharabi aur Aanto mein sozish paida kar sakta hei. lekin Amla se jo Iron haasil hota hei woh saaf khoon ki pedayish ke liye best hota hei. Jabke yeh pait ko kharab bhi nahi hone deta. Albatta yeh thoda sa qaabiz hota hei.

Amla ke Fayde in Hindi Urdu

Isko ba qaydgi ke sath khane waalay log sehatmand aur lambi umar paate hein. Is mein aik aisa maada paaya jaata hei jo Budhaape ke aasar ko khatam kar ke taqat ko qayim rakhta hei. Amla aapko har marz se bachata hei aur aapki umar 100 saal tak jaa sakti hei.

Amla jism ke bohat se Ghadoodo ko mutaharrik karta hei. Dil ke amraaz mein iska istemal behad mufeed hei. Dil ke mareezo ko chahiye ke 3 daane Amle ke har roz kha liya karein. Agar Dil kamzor ho ya dharkan taiz ho jaati ho to Amle ka Murabba use kejiye. Is se aapki yeh kamzori door ho jaye gi.

Aalu Bukhara Ke Fayde

Hath paaoon ki jalan, Nakseer aur jismani hiddat mein Amla ka istemal mukammal aaram deta hei. Jee matlana, Badhazmi, Khatte dakar aur Ishaal ho to yeh phal behtreen shaafi hei. Sar ka dard, sar chakrana, Dimaghi kamzori aur sar ke tamam amraaz ke liye Amla zabardast dawa hei.

Is aala phal ke kuch daane raat bhar ke liye paani mein bhigo kar rakh dejiye. Subha is paani se aankho ko dhoya jaye to aankho ki laali, Jalan aur nazar ki kamzori mein fayda hota hei. Aur agar is paani se sar ko dhoya jaye to Dimaghi kamzori aur sar chakrana theek ho jaye ga. Neez baal bhi narm-o-mulayim ho jaye gay.

Amla ka Juice ya Rus ke Fayde

Aap Amla ka Juice nikaal kar istemal kar sakte hein. Is maqsad ke liye Amlo ko kaat kar Guthliya alag kar lejiye. Phir kaate hue Amlo ko Juicer machine mein daal kar inka juice nikaliye. Aik kilo phal se lag bhag 2 glass juice nikal aye ga. Ab is juice ko kisi bottle mein daal kar fridge mein mehfooz kar dejiye.

Is juice aur Shehed yani Honey ka aik aik chamach 1 glass Paani mein mix kar ke roz subha pee lejiye. Aapko din bhar chaak-o-choband rakhe ga. Yeh antioxidants se bharpoor sharbat aik nehayat aala dawa ka kaam bhi karta hei. Is mein Diabetes aur Cancer samait beshumar amraaz ke khilaf ladne ki salahiyat hei. Cholesterol level ko theek karne ke ilawa wazan kam karne mein bhi moassar hei.

Jismani kamzori ka shikar log Amle ke juice aur Shehed ka aik aik chmach mix kar ke roz subha use karein. Yeh amal unki jismani kamzori door kar de ga. Sirf 2 hafte mein hi unke jism mein bharpoor tawanayi peda ho jaye gi.

Amla ke Juice mein Misri mila kar peete rehne se in beemariyo mein mukammal aaram milta hei. Rehem ki jalan aur beemariya, Masanay ki garmi, Peshab ki jalan ya ruk ruk kar aana aur Sozak.

Amla ka powder ya Khushk Amlo ka Safoof

Agar Taza Amla na mil sake to kisi Pansaar store se khushk Amlo ka powder ya safoof le lejiye. Aap yeh powder khud bhi tayyar kar sakte hein. Iske liye jab taza Amle mil jayen to unko kaat kar dhoop mein khushk kar lejiye. Iske baad grinder mein pees kar mehfooz kar lejiye. 

Yeh powder Amla ke juice ya rus ke mutabadil ke taur par use kiya jaa sakta hei. Jab is powder ko Shehed ke saath milaya jaye to aik umda majoon tayyar ho jaati hei. Is dawa se Phaiphro ke amraaz bhi theek ho jaate hein.

Bawaseer ke mareez agar yeh powder Gaaye (Cow) ke doodh ke saath subha aur sham use karein to bohat fayda ho ga. Bacha dani se khoon aata ho to din mein 3 ya 4 baar Amla ka powder paani ke saath khilane se marz door ho jaata hei. Is powder ke 2 chamach rozana roti ke saath khane se Budhapa door rehta hei. Agar jism mein kaheen Pathri ki shikayat ho to is powder ko Mooli ke juice mein mila kar use kejiye.

Agar is khushk Amla ke powder ko Manjan ke taur par use karein. To is se Daanto se khoon aana, Daant dard aur Daant hilne mein aaram aa jaata hei. Chot lagne se agar khoon band na ho to yehi powder zakham par daal kar patti baandh lejiye. Khoon ruk jaye ga neez is powder se Phoday bhi jald theek ho jaate hein.

Balo ki sehat ke liye

Balo ki mazbooti aur sehat ke liye Amla se behtar koi aur cheez nahi. Isko chahe khaya jaye ya iska paste Balo ki roots mein lagaya jaye, dono tarha se faydamand hei. Yeh balo ki roots ko mazboot karta hei aur inke natural color ko qayim rakhta hei.  Iske regular istemal se Ganje pan ka khatma ho jaata hei.

Amlo ko pees kar paani mein milaiye. Ab is paani se sar dhoya jaye to baal girna band ho jaate hein aur inki siyahi bhi qayim rehti hei. Amla ke powder ko paani ke saath mila kar Balo ki roots mein laip kar dejiye. Thori dair ke baad sar dho lejiye. Is se bhi baal khoob mazboot ho jayen gay.

Amla ke fayde yaqeenan hairat angeiz hein.

Khajoor Ke Fayde Janiye Dates Benefits in Urdu Hindi

Khajoor Ke Fayde Janiye Dates Benefits in Urdu Hindi

Dry Fruits ke Fayde Health Tips Roman Hindi/Urdu

Khajoor ke fayde is post mein aap jan sakte hein. Yeh aik nehayat Quwat bakhsh phal hei. Isko Sehra ki roti bhi kaha jata hei. Taza phal ko Khajoor aur khushk phal ko Chuhara kehte hein. Yeh ziyada tar Saudi Arab, Iran, Misr, italy, Spain aur Russia mein peda hota hei.

Khajoor ke ghizayi ajza

Tamam purani aur jadeed researches yehi baat saabit karti hein ke Khajoor aik ghizayi ajza se bharpoor phal hei. Har 100 Gram Khajoor mein taqreeban 315 Calories payi jaati hein. 

Aur isi miqdar ke phal mein 15.3% paani, 2.5% Protein, 0.4% Fats, 75.8% Carbohydrates aur 3.9% Fiber paya jata hei. Jabke isi miqdar mein Calcium 120 mg, Phosphorus 50 mg, Iron 7.3 mg, Vitamin C 3 mg aur Vitamin B complex ki kuch miqdar bhi payi jaati hei.

Khajoor Ke Fayde in Urdu Hindi

Khajoor ka mizaj Garm aur Tar hota hei. Badan ko taqat deti hei. Naya aur saaf Khoon peda karti hei isi liye kamzor logo ke liye behtreen ghiza hei. Khas tor per sardi ke mausam mein iska istemal behad mufeed hei.

Khajoor mayda ki islah karti hei. Iska regular istemal Qabz ka khaatma karta hai. Yeh aik hazam ke amal mein madad dene wala phal hei, albatta khud der se hazam hoti hei. Jism mein iske hazam ho jaane ke baad iska bach jaane wala mawad, Aanto mein jaa kar harkat peda karta hei. Jiski waja se Qabz door karne mein madad milti hei.

Minni ko gaarha kar ke Mardana taqat mein behad izafa karti hei. Peshab ki jalan khatam karti hei. Kisi bhi qisam ka wurm ho khajoor khaane se tehleel ho jata hei. Faalij aur Laqwa ke marz mein bhi iska khaana mufeed hota hei.

Khajoor ki Guthli ko jala kar iski Raakh ko mehfooz kar lein. Jab bhi kabhi zakham lag jaye aur Khoon beh raha ho to yeh Raakh zakham par laga dein. Is se khoon behna bhi band ho jaye ga aur yeh zakham ko bhi saaf kar de gi. Jabke yeh Raakh aap ke Daanto ke liye aik behad umda Manjan ka kaam bhi de sakti hei.

Kuch mazeed Khajoor Ke Fayde

Khajoor Dil, Jigar aur Dimagh ki kamzori ko door karti hei. Gurdo ko bhi quwat deti hei. Saans ki takleef mein aaram pohanchati hei. 

Dil ki kamzori door karne ke liye Khajoor ke chand daane raat bhar paani mein bhigo ker rakh dein. Subha uth kar Guthliya nikal kar in bhigoyi hui Khajooro ko isi paani mein masal kar pee lein. Yeh amal hafte mein 2 baar kiya karein. Kuch arse mein Dil ki kamzori door ho jaye gi.

Jinsi Kamzori door karne ke liye aap chand Khajoor ke daane bakri ke doodh mein raat ko bhigo kar rakh dejiye. Subha Guthliya nikal kar Khajooro ko masal dejiye aur isi doodh mein rehne dejiye. Ab is doodh mein thora sa Shehed milaiye. Iske ilawa pisi hui choti Ilaychi ki aik chutki milaiye aur pee lejiye.

Yeh nuskha kuch din tak use karte rahiye. Is se Jinsi taqat mein izafa hone ke ilawa aapki Timing bhi barh jaye gi.

Khajoor ke fayde jo ziyada ehem hein ham ne yahan beyan karne ki koshish ki hei. Agar aap kuch mazeed jankari rakhte hein to please comments kejiye.

Dangi ya Dengue Bukhar ki Alamat Ilaj aur Bachne ke Tarike

Dangi ya Dengue Bukhar ki Alamat Ilaj aur Bachne ke Tarike

Health Tips Roman Hindi/Urdu

Dengue ya Dangi Bukhar koi naya marz nahi hei. Yeh aik makhsoos qism ke machar ke kaatne se insani jism mein daakhil hota hei. Iska ziyada tar shikar Asiai mumalik ke log hein. Lekin ghubrane ki koi baat nahi, yeh mukammal taur par aik qabil e ilaj marz hei.

Dangi Bukhar ki alamat

Is marz mein mareez ko taiz bukhar ke saath saath sir mein bohat sakht dard hone lagta hei. Blood pressure bohat kam ho jaata hei. Jism achanak bohat thanda ho jaata hei.

Ghutnon mein takleef aur joron mein bhi dard hona shuru ho jaata hei. Jism insani ki Quwat e Mudafeyat taqreeban khatam ho jaati hei. Surkh rang ke dhabbe poore jism par zahir hone lagte hein.

Dangi Bukhar ke Marahil

Dangi Bukhar ke 4 marahil hote hein. Ibtadai 2 marahil mein ilaj aasani se ho sakta hei. Lekin aakhri dono Marahil mein jaan bachana namumkin ho jaata hei. Yeh chaaron marahil neeche byan kiye gaye hein.

Pehla marhala, Mareez ko shadeed Bukhar aur ooper byan karda alamaat bhi zahir hone lagti hein.

Doosre marhale mein pehle marhale ki alamaat ke saath saath bari Aant, Masoorhon aur jild se khoon behne lag jaata hei.

Teesre marhale mein Nizam e Dauran e khoon bhi shadeed taur par mutassir hota hei.

Chothe marhale mein mareez ke liye takleef na qabile bardasht ho jaati hei. Aur Quwat Mudafeyat ke naa hone ki wajha se woh kai beemariyon ka shikar ho jaata hei.

Dangi Bukhar se bachao ke liye ahtiyati tadabeer

W.H.O ke mutabiq duniya bhar mein jitni bhi amwaat hoti hein, un mein Dangi Bukhar se hone waali amwaat ka tanasub 4% hei. Sirf ahtiyat se hi is marz se mukammal bachao mumkin hei.

Chunke Dengi marz ko phelaane waale Machar sirf saaf paani mein rehna pasand karte hein. Isliye apne gharon aur baagheecho mein kaheen par bhi saaf paani ko khada mat hone dein. Saaf paani ke tamam bartan dhaanp kar aur water tank ko hamesha dhakkan laga kar rakhein.

Yahan jaaniye Badam Ke Fayde

Machar maarne waale spray ka baa qaydgi se istemal karein. Aur ghar ke har kone aur bistron aur Sofa set ke neeche spray laazmi kiya karein.

Dangi ke Machar ziyada tar Suraj ke nikalne aur doobne ke auqat mein hi hamla aawar hote hein. Isliye in auqat mein khasoosi ahtiyat kiya karein.

Machar daani aur Machar bhagane waale lotion ka istemal bhi aik achi ahtiyat hei.

Dangi Bukhar ka ilaj

Kamzor Quwat mudafeyat ke haamil log, kam sehat mand afraad, Boorhe log aur Bache Dangi marz se zyada mutasir hote hein. Albatta jadeed researches ke mutabiq yeh Bukhar itna khatarnaak nahin jitna is ko samjha jaata hei. Zaroori dekh bhaal aur baa qayda ilaj se sirf aik hafte se do hafte ke dauran mukammal shifa haasil ho jaati hei.

Tibbi mahireen ki research ke mutabiq, Dangi Bukhar ke ilaj ke liye Papeete ke patte aur Shehed yani Madhu ka istemal behtreen saabit hua hei.

Yeh bhi parhiye Anjeer Ke Fayde

Hamare piyare Rasool (Sall ALLAH o alaihe Wa aalehi wasallam) Shehed ko Paani mein hal kar ke peena pasand farmaate thay. Bilkul isi tarha aik cup neem garam paani mein aik chamcha Shehed mila kar din mein 3 baar khane se kuch deir pehle mareez ko pila diya karein.

Papeete ke patton ka rus nikaal kar subha aur shaam pilana bhi Dangi Bukhar ka Shaafi ilaj hei.

Bakri ka Doodh bhi is marz mein nehayat mufeed saabit ho sakta hei. Mareez ko din mein baar baar Bakri ka doodh pilaate rehna chahiye.

Hamain ummeed hei ke Dangi Bukhar ki alamat aur ilaj ke baare mein yeh maloomat aapke kaam aayen gi.

Achi Neend Lene Ka Fun ya Behtreen Tarika Janiye in Hindi Urdu

Achi Neend Lene Ka Fun ya Behtreen Tarika Janiye in Hindi Urdu

Health Tips Learn Roman Hindi/Urdu

Achi neend ALLAH taala ki bohat bari nemat hei. Iski kami se Dimagh susti ka shikar ho jaata hei aur kaam karne ki salahiyat mutasir hoti hei.

Agar neend ki kami musalsal jaari rahe to insan bohat saare jismani aur Zehni masayil ka shikar ho sakta hei. Jabke raat ki mukammal neend lene se Jism aur Dimagh ko sakoon milta hei. Aur insan roz marah ke kaam karne ke qabil ho jaata hei.

Gehri Neend aankho ki thakawat door kar ke unko tar o taza rakhti hei. Neend puri na hone se aankho ko bohat nuqsan hota hei. Raat ko jaldi sona aur Subha sawere uthna, insan ko tandrust banaye rakhta hei.

Raat bhar ki puri Neend aur mukammal aaram ki is tadbeer se Dimagh aur Aasaab ko woh taaqat muyassar aati hei. Jo phir se din bhar ke masayil, mushkilaat aur takleef deh haalaat se muqabla karne ki salahiyat peda kar deti hei. Lehaza har insan ko is sunehre asool "Jald sona aur Subha sawere uthna" ko apnana chahiye.

Achi neend lene ke liye kya kiya jaye

Aksar logon ko mukhtalif wajuhaat ki bina par Neend nahi aati. Isliye zaroori hei ke un asbaab ka pata lagwa kar unko door kiya jaye. Jinse Neend mein khalal peda hota hei. Maslan tafikraat aur gham o ghussa se chunke Dimagh mein khoon munjamid ho jaata hei. Isliye in kefiyaat mein Neend be intaha mutasir hoti hei.

Parhiye Balo Ko Sidha Karne Ke Tarike

Lehaza iska khayal rakhna chahiye ke sote waqt Dimagh tamam qism ki uljhano se aazad ho. Iski tadbeer yeh hei ke sote waqt aaram deh bister par haath pair phela kar khaali zehen ke saath letaa jaye. Is surat mein meethi aur gehri Neend haasil ho sake gi.

Iske ilawa yeh bhi khayal rakhiye ke roshni ki koi kiran sone waale ki aankho par na pare. Warna khoon ka bahao Dimagh ki taraf barh jaye ga. Aur aasabi nizam mein harkat peda ho jaye gi. Jis se neend khasi mutasir ho jaye gi.

Achi Neend Lene Ka Fun The Art of Sleeping

Apni be aitdaliyon ki waja se insan ne neend jesi nemat ko apne liye museebat bana rakha hei. Dr. Hamza Al Hamzawi ne apne lecture The Art of Sleeping, yani neend lene ka Fun mein achi neend lene ke liye apni research ke mutabiq kuch tarike bataye hein. Jinke mutabiq:

Isha ke baad raat 9 se 12 baje tak sona: In auqaat ke doraan sona sab se ziyada fayda mand hei. Aik insan apni neend ka 80% hissa in auqaat mein pura kar sakta hei. Kiunke in auqaat mein neend ke liye barkat hei, so is waqt ki neend ka matlab: Aik Hour ki neend = Teen hour ki neend.

Is waqt ke doran Dimagh ka Gland aik harmon peda karta hei. Jo hamein achi neend lene mein madad deta hei. Yeh sirf usi soorat mein peda hota hei agar:

1. Sone ke doran kamre mein andhera ho. 

2. Agar neend nahi aa rahi tab bhi insan sakoon se lait jaye.

Dengue Bukhar ki Alamat aur Ilaj

Raat 12 baje se 2 baje tak sona:  In auqaat ke doraan sone se insan ki 20% gehri neend puri ho jaati hei. Iske baad ka sona achi neend ke liye fayda mand nahi. Kiunke insan apni 100% neend puri kar chuka hota hei. In auqaat mein sone ka matlab:  1 Hour ki neend = 1 Hour ki neend

2 baje se 5 baje tak yani Fajar se pehle ke auqaat: Yeh waqt kuch yaad karne ke liye behtreen hei. ALLAH ko yaad karne ke liye, Zikar aur Astaghfaar karne ke liye, yaa zehni irtakaz aur Muraqba karne ke liye.

Fajar ki namaz se Suraj nikalne tak sona:  In auqaat mein Dimagh aik doosra harmon khaarij karta hei. Yeh Harmon in auqaat mein sirf isi soorat mein khaarij hota hei jab:

1. Insan jaag raha ho.  
2. Roshni ke saath halki phulki warzish bhi ho.

Yeh waqt hei Zikar o Azkaar ka, ghor o fikar karne aur din ko hone waale kaamon ki mansooba bandi karne ka.

Din ko sona (Fajar ke baad): Yeh bilkul bhi fayda mand nahi.  In auqat mein sone ka matlab: Teen Hour ki neend = Aik Hour ki Neend

Is waqt sone mein koi barkat nahi. Balke yeh saara din kaahili, susti aur tawajja mein kami ka bayis banta hei.

Achi neend ke liye kuch mazeed info

Insani Dimagh mein Harmons ka khaarij hona 40 saal ki umar ke baad kam hota jaata hei. Aur 50 saal ki umar mein yeh ikhraaj ruk jaata hei. Is waqt insan ka jism us harmon ko hi use karta hei. Jo guzishta saalon mein jism main jama hua tha.

Ab agar koi insan Alzhimer aur Schizophrenia jaise Dimaghi amraaz ka shikaar hota hei. To iska matlab yeh hei ke woh zindagi bhar der se soya karta tha.

Agar aap Dr. Hamza ke bataye hue is tarike se achi neend haasil karne ki aadat daal lein. To aapko kabhi bhi neend ki kami ka saamna nahi karna pare ga.

Balo Ko Sidha Karne Ke Gharelu Tarike (Behad Aasan)

Balo Ko Sidha Karne Ke Gharelu Tarike (Behad Aasan)

Beauty Tips Roman Hindi/Urdu

Balo Ko Sidha Karne Ke Gharelu Tarike aap is article mein jaan sakte hein. Taqreeban har aurat ya larki ki khwahish hoti hei ke uske Baal narm aur Sidhe hon. Yehi waja hei ke Balo ko sidha karne waali products ki maang bohat ziyada hei.

Lekin kya aap jaante hein ke in products mein chemicals shamil kiye jaate hein. Jo aapke balo ki sehat ko buri tarah se mutassir kar sakte hein. Jabke iske muqable mein agar Gharelu Nuskhe yaa Qudrati Totke istemal kiye jayen, to woh ziyada mehfooz aur moassar sabit hote hein.

➧Yahan jaaniye Kishmish ke fayde

Isi liye aaj ham aapko aise hi chand Gharelu Nuskhe ya tarike batayen ge. Jo Balo ko Sidha karne ke liye jaadu jaisa asar karte hein. Aur unke koi side effects bhi nahi hote.

Balo Ko Sidha Karne Ke Gharelu Tarike

Balo Ko Sidha Karne Ke Gharelu Tarike mundarja zeil hein.

Nariyal ke Paani aur lemo ke Ras ka Tarika

Nariyal ka paani Balo ko narm karne ke liye acha hota hei. Aap aik Cup mein Nariyal ka Paani aur 2 Lemo ka ras mila kar raat bhar ke liye fridge mein rakh dei.

Subha ke waqt aapko cup ke ooper aik Careem si nazar aaye gi. Ab is careem ko nikaal kar apne balo par lagayen. Aur uske baad Balo ko aik Garm Towel mein aik ghante tak dhaanp kar rakhein. Iske baad inko dho kar conditioner kar lein. Is tarike se aapke Baal Sidhe aur narm ho jayen ge.

Garm Tail ke istemal ka Tarika

Balo par Garm Tail lagane se yeh Narm aur healthy ho jaate hein. Agr aap is Tail ka istemal karna apna mamool bana lein to aapke Baal Sidhe ho jayen gay. Is maqsad ke liye Nariyal ka Tail aur Badam ka Tail brabr miqdar mein mila kar isko garm karein aur apne balo per lagayen.

➧ zaroor parhiye Aalu Bukhara ke fawaid

Iske baad balo ko aik Garm Towel se aik ghante tak lapait kar rakhein. Baad mein inko kisi ache Shampoo se dho lein. Is tarike ke results aapko hairan kar dein ge.

Balo ki natural Conditioning kar ke

Aap apne Balo ke liye khud se natural Conditioner tayyar kar sakte hein. Jis se na sirf inki growth aur health behtr ho gi, balke yeh narm aur Sidhe bhi ho jayen ge.

Is maqsad ke liye aap aadha cup Alsi ke beej lein. Aur inko 3 cup paani mein raat ke waqt bhigo kar rakh dein. Subha uth ker apne Balo ko kisi ache Shampoo se dhone ke baad is paani ko apne balo par istemal karein.

Doodh aur Ande ki zardi ke istemal ka Tarika

Doodh aur Anda sehat ke saath saath Balo ko sidha karne ke liye bhi istemal ho sakte hein. Iska tarika yun hei, ke aap aik cup Doodh mein 2 Ando ki Zardi ko daal kar achi tarha mix karein aur apne balo par laga lein.

➧Maloom karein Baal Lambe Karne ka Tarika

Isko aik ghante tak sir par laga rehne dein. Taake protein aur doosre fayda mand ajza Balo mein jazb ho sake. Iske baad Shampoo se sir ko 2 baar dho lein. Is tarike se bhi Baal sidhe ho jayen ge.

Doodh, Shehed aur Kele ka Tarika

Aap Doodh mein Shehed ko milaiye aur phir is mein Kele yani Banana ko masal kar daal dejiye. Phir achi tarah se iska paste tayyar kariye. Ab is paste ko Balo par laga kar isko 2 ghante ke liye rehne dejiye. Taake yeh ache se khushk ho sake. Iske baad Shampoo se dho lein. Yeh bhi aik zabardast tarika hei Baal seedhe karne ka.

Yeh tmam Balo Ko Sidha Karne Ke Gharelu Tarike bohat hi aasan hein. Inke koi side effects bhi nahi. Aap inko ghar par easily try kar sakte hein.

Amrood Ke Faide Benefits of Guava in Urdu Hindi

Amrood Ke Faide Benefits of Guava in Urdu Hindi

Health Tips Roman Hindi/Urdu

Amrood Ke Faide yaa Guava Benefits bohat se hein. Amrood aik behtreen Ghiza aur Dawa hei. Iska darakht saal mein 2 baar phal deta hei. Aik baar Barsaat mein aur doosri baar sardion mein.

Is mein Vitamin C aur Fiber yani Raisha kaafi miqdar mein paaya jaata hei. Iske ilawa is mein Protein, Fats, Carbohidrates, Calcium, Iron, Phosphorus, Vitamin A aur B bhi paye jaate hein.

Amrood Ke Faide, Benefits of Guava in Urdu Hindi

Amrood Ke Faide hairat angaiz hein. Amrood ka mizaj pehle darje mein Garm aur Tar hota hei. Yeh aik nehayat Farhat bakhsh phal hei. Bhook ki kami ko door karta hei. Dil ko taqat dene ke saath saath Dil ki dharkan ko bhi normal karta hei.

Yeh Qabz Kusha hota hei. Isko khana khane ke baad khao to Qabz ka khatma karta hei. Lekin agar khana khane se pehle khao to Qabz paida karta hei.

Bawaseer Khooni ke mareezon ke liye iska khana mufeed hei. Yeh Bawaseer ke Masson ki jalan ko khatam kar deta hei.

Yeh Mayday ko Quwat deta hei. Isko Namak aur Kaali Mirch ke ssath khana chahiye. Is se yeh zood hazam ho jaata hei. Amrood khaane ke baad ooper se Paani nahi peena chahiye, warna Gala kharaab ho sakta hei.

Amrood khaane se Aanton ki Hawa, Mayday ki Jalan, Puraani Badhazmi, Dayemi Qabz aur Tezabiyat theek ho jaati hei.

Jaaniye Aalu Bukhara Ke woh Fayde jo shayad aapko maloom nahi.

Khoon ki Hiddat aur Jild ki kharabi ko door karta hei. Jee matlaa raha ho to iski Khushbu se tabiyat behtar ho jaati hei.

Amrood ke chand aur fayde

Amrood ke Beej hazam nahi hote lekin yeh Pait ke Keere khatam karne mein bohat moassar hote hein.

Heiz ki ziadti hone ki soorat mein bhi yeh phal behad mufeed hota hei.

Kache Amrood Qabz paida karte hein. Isliye inko khaane se Dast ke mareez ko fayda hota hei aur Dast aane band ho jaate hein.

Anjeer Ke Fayde jaaniye

Amrood ke Patton ko Paani mein Josh de kar is paani se Ghararay kiye jayen, to Munh ka wurm theek ho jaata hei. Aur hilte hue Daant theek aur Masoorhe mazboot ho jaate hein. Iske ilawa yeh Paani Haizay ke mareez ko pilaya jaye to uske puraane Dast band ho jaate hein.

Amrood ke faide jaan kar hamein yaqeen hei ke aap log isko zaroor khana pasand karein ge.

Angoor Ke Faide in Urdu Hindi

Angoor Ke Faide in Urdu Hindi

Health Tips Roman Hindi/Urdu

Angoor ke faide jaan-ne ke liye yeh post parhein. Angoor ALLAH taala ki aik bohat bari nemat hei. Quran-e-Paak mein 11 mukhtlif Aayaat mein iska zikar aaya hei. Yeh aik ghizaiyat se bharpoor aur aasani se hazam ho jaane waala phal hei.

Insani Sehat aur Quwat ki bahaali ke liye Qudrat ka aik anmol tohfa hei. Iski be shumar iqsaam hoti hein. Yeh green, red, yellow aur black color mein aata hei. Iske daane Matar ke daane se le kar Aalu Bukhara ke jitne bhi hote hein.

Mizaj ke lehaz se yeh pehle darja mein Garm aur Tar hota hei. 100 Gram Angoor mein 32 Calories hoti hein. Jabke is mein 92% Paani ke ilawa Protein, Fats aur Carbohydrates paye jaate hein. Iske ilawa is mein Calcium 20mg, Phosphorus 20mg, Iron 0.25mg, Vitamin C 31mg ke ilawa Vitamin A aur B complex ki bhi kuch miqdar hoti hei.

Angoor ke faide in Urdu Hindi

Angoor ke faide to be shumar hein jin mein se kuch ham yahan beyan karein ge.

Yeh naa sirf Khoon ko saaf karta hei, balke saaleh Khoon paida bhi karta hei. Seene aur Phaiphron ki islah karta hei.

Angoor mein yeh salahiyat hei ke yeh fori tor par Jism ko Hararat aur Tawanayi mohayya karta hei. Is mein Glucose hota hei, jo Jism mein pohanch kar foran Khoon mein jazb ho jaata hei.

Aam Jismani kamzori aur Haazma ki kamzori ke mareezo ke liye Angoor aik bohat achi ghiza hei. Yeh Dil aur baqi tmam Aaza ki karkardgi ko behtar banata hei.

Yeh bhi zaroor parhiye Akhrot Benefits Ya Khane Ke Fayde

Angoor mein mojood Shakar, Khulwi maada aur naamyaati Tezab mil kar ise Julaab aawar banate hein. Jis se Qabz door ho jaati hei. Is maqsad ke liye 350 Gram Angoor rozana khana chahiye. Agar Angoor ka mausam na ho to Kishmish ko thori der tak paani mein bhigo ker istemal kiya jaa sakta hei.

Dil ke marz mein Angoor khana nehayat mufeed hei. Yeh dil ko taqat deta hei. Dil ke dard aur Ikhtilaj e Qalb ko door karta hei. Yeh mareez ko dil ki taiz dharkan aur uske sangeen nataij se bachata hei. Heart Attack ke baad mareez ko Angoor ka ras pilana bohat mufeed saabit hota hei.

Kuch mazeed Angoor ke faide

Dama ke mareezo ke liye bhi Angoor fayda mand hei. Dr. Old Field Angoor aur uske ras ko Dama ka moassar ilaj qarar dete hein. Unka khayal hei ke Dama ke mareez ko agar Angooron ke baagh mein rakha jaye, to woh bohat jald sehatyaab ho jaata hei.

Angoor mein Paani aur Potassium kaafi miqdar mein paye jaate hein. Is waja se yeh munfrid qism ki Peshab Aawar salahiyat rakhta hei. Choonke is mein Albumin aur Sodium Chloride ki qaleel miqdar payi jaati hai, is liye yeh Gurdon aur Masana ki Sozish aur Pathri ka bhi khatma karta hei.

Aik mufeed mazmoon Pista ke Fayde

Masoorhon ki Sozish ka behtreen ilaj Angoor khana hei. Kiunke Angooron ka naamiyati tezab moassar qism ka Jaraseem kush hota hei. Maahireen ke mutabiq agar Masoorhon se peep aa rahi ho aur saare daant hil rahe hon to aap chand din tak sirf Angooron ko ghiza ke tor per istemal kerte raho. Is amal se Daant aur Masoorhe mazboot ho jayen gay aur Peep aana band ho jaye gi.

Angoor mein aik ehem compound daryaft hua hei. Jisko Vitamin P ka naam diya geya hei. Yeh aik aisa chemiyai juz hei jo Diabetes se paida shuda khoon ko behne se rokta hei. Jism ke wurm aur nasson ki soojan ko kam karta hei.

Kache Angoor ka ras Gale ki kharabiyo mein mufeed samjha jaata hei. Angoor ke patte Ishaal ko rokte hein. Angoor ka Sirka Mayda ki kharabi ki aik umda dawa hei.

Angoor khaane mein ahtiaat

Jin logon ka mizaaj garm ho unke mizaaj mein iske khaane se garmi barh jaati hei. Aise log isko khaane ke baad ooper se Shikanjabeen pee lein. Yaa koi khatti cheez maslan Anardaana khaa lein, to phir aisa nahi hoga. Albatta jis Angoor mein thora khatta pan ho woh garmi peda nahi karta.

Agar Angoor khaane ke baad kisi ka pait phool jaata ho to usko chahiye ke iska chilkaa thook diya kare. Agar phir bhi pait phoolta ho to ooper se Zeera yaa koi aur haazim cheez kha li jaye. Aise log Kacha Angoor khaane se bhi parheiz karein.

Angoor ke faide aur bhi bohat se hein. Lekin jo ziyada ehem hein woh ham ne beyan karne ki koshish ki hei.

Aalu Bukhara Ke Fayde in Urdu Hindi

Aalu Bukhara Ke Fayde in Urdu Hindi

Health Tips Phalon ke Fayde Roman Hindi/Urdu

Aalu Bukhara ke fayde shumar karna mumkin nahi. Yeh aik aisa phal hei jo apne ander be intaha tibbi fawaid rakhta hei. Yeh aik Anti oxidants se bharpoor phal hei. Is mein Proteins, Calcium, Phosphorus, Iron, Nishasta daar ajza, Vitamin A, B aur C kaafi miqdar mein paye jaate hein. 

Aik paao Aalu Bukhara mein 2 roti Ke brabar taqat hoti hei. Insani mayda isko 2 se 3 hours mein hazam kar leta hei. Garam mizaaj logon, beemaari ke baad kamzor ho jaane waale logon aur haamla khwateen ke liye yeh aik anmol Naimat hei.  Jabke is mein mojood Vitamin B6 hamare Aasabi nizam ko mazboot banata hei.

Aalu Bukhara ke fayde in Hindi Urdu

Aalu Bukhara ka mizaj sard aur Tar hei. Iske regular istemal se Cholesterol ko bhi kaafi had tak control kiya jaa sakta hei. Dimagh Ke liye yeh aik behtreen tonic hei. Bud mizaaj logo Ke liye bhi behad mufeed ghiza hei. Kiunke iske istemal se mizaaj khush gwaar ho jaata hei. 

Khushk Aalu Bukhara munh mein rakh ker choosne se Matli aur Ulti aane ki kefiyat khatam ho jaati hei. Haamila (Garvpati) khwateen ki matli aur Ulti mein iska khana bohat mufeed hei.

Yeh zaroor parhiye Kishmish Health Benefits

Masana ki hararat aur khoon ki tezabiat door karne ke liye yeh phal bohat mufeed saabit hua hei. Jin logon ke haath pair jalte hon, Paakhana khul kar naa aata ho, subha jaagne par munh ka zayqa kardwa lage, dakaar aate hon aur Qabz ki shikayat ho, unko chahiye ke iske mausam mein rozana subha ka naashta isi phal se kiya karein. 1 se 2 hafton mein hi unki yeh shikayaat door ho jaye gi.

Aalu Bukhara khaane se charbi bhi tehleel ho jaati hei. Jin logon ko aksar pait mein gas ki shikayat rehti ho, yaa jin logon ka pait bardha hua ho, woh log naashte mein sirf yeh phal khayen. Iske saath saath Meethi aur tali hui cheezein khaana chhor dein. Aur din mein 2 baar lemon ki Shikanjabee pee liya karein to chand hi hafton mein bardha hua pait kam ho jaye gaa.

Neend ki kami ka shikar logo ko achi neend ke liye iska istemal regular karna chahiye. Agar aap ko aksar Zehni dabao yaa tanaao ho jaata hei, to aap kisi bhi medicine ki bajae Aalu Bukhara kasrat se khana shuroo ker dein. Chand hi din mein aap kaafi behtri mehsoos karein gay. 

Jild ki beemario mein Aalu bukhara ke istemal ke sath aik glass Sharbat e Unnab rozana peene se fayda hota hei.

Yeh bhi parhiye  Anjeer Ke Fayde

Agar aap apne Pitte mein pathri ban-ne se rokna chahte hein, to Aalu Bukhara rozana khana apna maamool bana lein. Agr iska mausam na ho to khushk Aalu bukhara ko hi bhigo kar istemal kar liya karein. Is amal se to baaz oqaat pitte mein mojood pathri bhi pighal ker nikal jaati hei. Jabke yeh Gurda aur Masana ki pathri ko bhi tor deta hei.

Maahireen Ke mutabiq khushk Aalu Bukhara ka istemal aap ko Aanto Ke cancer se bachata hei. Is mein kuch aise anti oxidants paye jaate hein jo Cancer Ke khatraat ko naa sirf kam karte hein, balke Cancer hone ki soorat mein is marz Ke ilaaj mein behtri aa jaati hei.

Jabke Blood Cancer Ke marz mein bhi iska istemal behad mufeed hei. Yahan tak Ke agar Cancer early stage mein ho to sirf iske regular khaane se hi theek ho jaata hei.

Aik aur mufeed mazmoon  Kaju Ke Fayde

Woh log jo Gurdo ke mareez hein yaa woh jinko Peshaab ruk ruk kar aata ho, unke liye Aalu Bukhara ka istemal akseer hei.

Aalu Bukhara ka aik nihayat kaar aamad Nuskha

5 daane khushk Aalu Bukhara, 7 daane Munaqqa yaani bari Kishmish lejiye jiske beej nikaal diye gaye hon. Aur 1 chamcha Saunf le kar in sab ajza ko 1 glass neem garam paani mein raat ko bhigo kar rakh dein. Subha uth ke in sab ajza ko masal ker chhan lein aur pee lein.

Yeh nuskha High Blood Pressure, Matli, Ulti, Badhazmi, Bhook naa lagna, Qabz, Sar dard aur aadhe sar ke dard ke liye behad fayda mand hei. Jigar ki kamzori aur Yarqaan ki baaz qismon mein bhi yeh aik kaar aamad nuskha hei.

Nuskha istemal kerne mein ahtiyat

Agar is nuskhe ke istemal se paakhana ziyada aane lage to is mein se Munaqqa ko nikaal dejiye. Iske ilawa jin logon ko Khansi yaa nazla rehta ho, yaa Gala kharab rehta ho, woh is Nuskha ko istemal naa karein. Jabke sakht sardi ke mausam mein bhi is nuskhe ko istemal karne se guraiz karein.

Aalu Bukhara ke fayde yaqeenan hairat angeiz hein.

Pista ke Fayde Pistachio Benefits in Hindi Urdu

Pista ke Fayde Pistachio Benefits in Hindi Urdu

Dry Fruits ke Fayde Health Tips Roman Hindi/Urdu

Pista ke Fayde ya Pistachio Benefits beshumar hein. Yeh un chand ghizaon mein shamil hei jo mukammal Insani sehat ke hawale se apne ander bohat ziyada ghizayi afadiyat rakhti hein. Mukammal fawaid maaloom karne K liye yeh article aakhir tak parhiye.

Pista ke Fayde in Hindi Urdu

Yeh Aaza e Raisa yani Dil, Dimagh aur Jigar K ilawa stomach yani Mayde K liye bhi nehayat mufeed hei. Kidneys ko Taqat deta hei. Dil ki ghubrahat aur Khansi mein fayda mand hei. Balgham ko door karta hei. Wabayi Amraaz se hifazat karta hei. Daant aur Masoodhon ko mazboot banata hei.

Lekin yeh Qaabiz bhi hota hei. Iska istemal aik had Ke ander reh kar kerna chahiye. Pista mein mundarja zail Ghizayi ajza paye jaate hein:

Proteins, Carbohydrates, Fiber yani Raisha, Fats, Potassium, Phosphorus, Iron, Magnesium, Calcium, Copper, Manganese, Zinc, Selenium, Vitamin A, Vitamin B-6, Vitamin C, Vitamin E, Vitamin K, Thiamine, Niacin, Riboflavin, Beta-carotene, Zeaxanthin, Lutein, Pantothenic acid aur folate. Yeh tamam ajza Pista ko aik behtreen ghiza banate hein.

Janiye kaju ke fayde

Yeh baat khaas tor par qaabil e zikr hei ke Pista mein phosphorus aur potassium ki bhaari miqdar payi jaati hei. Jo baqi Dry fruits ki nisbat ziyada hei. Jabke is mein Protein ki miqdar bhi baqi tamam Dry fruits ke muqable mein bohat ziyada hoti hei. Har 1 ounce Pista mein 6 Gram Protein hoti hei. Is lehaz se yeh aik Protein rich ghiza hei.

Pista mein doosre khushk meva jaat ke muqable mein kaafi kam calories payi jaati hein. Aik ounce Pista mein 160 Calories hoti hein. Yehi waja hai K yeh diet karne wale logon K liye behad mufeed hota hei. Apni low calories, low fats aur high protein ki waja se yeh wazan kam karne waale logon ki bhi awaleen pasand hei.

Pista khana Dil ki sehat K liye mufeed hei. Researches kehti hein K is mein Fats ki miqdar kaafi kam hoti hei. Yeh mono-unsaturated fatty acids ke hasool ka bhi aik ehem zariya hei.

Akhrot khane ke fayde janiye

Agar aap isko baa qaydgi se istemal karo to yeh aap K muzre Sehat cholesterol yani (LDL) ko kam karta hei. Balke yeh aap K jism mein mufeed cholesterol yani (HDL) mein Izafa karta hei. Khoon mein Clots nahi ban-ne deta aur Sharyaano yani Veins K tang hone K amal ko rokta hei. Yun aap isko Dil ka dost bhi keh sakte hein.

Pista ke mazeed fayde

Pista mein mojood Copper aap K jism mein ghiza se haasil hone waale Iron ko jazab karne mein madad karta hei. Jis ki waja se jism mein khoon ki kami nahi hone paati aur Anemia jaise marz se bachao mumkin ho jata hei.

Jabke is mein sodium yani Namak ki miqdar bhi na hone K barabar hoti hei. Jiski waja se yeh hypertension yani High Blood Pressure ke mareezon K liye bhi mufeed hei.

Pista ka istemal insani jild ke liye bhi mufeed hei. Is mein shamil carotenoid antioxidants barhti umar ke asraat ko jild par zahir hone se rokte hein. Yeh jild ko khushki se bhi bachata hei.

Pista khana Sugar ke marz mein bhi mufeed hei. Sugar ke mareez ke jism mein Sugar Proteins ke sath mil kar us ko naqabil e istemal bana deti hei. Is amal ko glycation kaha jaata hei. Pista mein mojood antioxidants is amal ko kam karte hein. Jiski waja se Sugar ke mareez ko fayda hota hei.

Aik research K mutabiq Pista aadmi ki Jinsi quwat ko bhi barhata hei. Is research ke doran 3 hafte tak matwatar 100 gram Pista khaane waale mardon ki jinsi karkardgi mein 50% izafa note kiya gya. Aur is izafe ki tasdeeq ultrasound K zariye bhi ki gayi. Jis mein mardana jinsi Aaza ki taraf khoon ka flow check kya gya.

Pista ke Fayde jaan lene ke baad ham logo ko ALLAH ka shukar ada karna chahiye, jis ne hamein yeh naimat ata farmayi.

Kaju Ke Fayde Cashew Benefits in Hindi Urdu

Kaju Ke Fayde Cashew Benefits in Hindi Urdu

Dry Fruits ke Fayde Health Tips Roman Hindi/Urdu

Kaju Ke Fayde ya Cashew Benefits bohat se hein. Yeh Barr-e-Sagheer ke janglaat mein kaasht kiya jaane waala aik mashhoor darakht hei. Zayqe ke lehaz se yeh aik behad lazeez aur shirin khushk meva hei.

Agar ham Giri daar meva jaat ka aitdal ke sath istemal karein, to hamari ghiza bari had tak mutawazan ho jaye gi. Kiunke yeh Protein, Vitamins, Minerals aur Maan-e-Takseed ajza yani Anti Oxidants se bharpoor hote hein.

Kaju Ke Fayde Cashew Benefits in Hindi Urdu

Kaju ka mizaj Garm aur Tar hota hei. Is mein chiknayi ki miqdar bohat ziyada hoti hei, lekin yeh jism ke liye mufeed chiknayi hei. 100 Gram Kaju mein taqreeban 600 Calories aur 60 Gram chiknayi hoti hei. Is chiknayi se Ghadoodon aur Uzlaat ke afaal ko fayda hota hei.

Kaju ki shakal Insani Gurde yani Kidney se milti hei. Iska baqayda istemal hamare Gurdon ko mazboot aur sehatmand banata hei.

Janiye Pista ke fayde

Kaju insani jism ko farhat aur taazgi bakhshta hei. Dil ko taqatwar banata hei. Minni aur Quwat-e-Baah mein izafa karta hei. Aqal aur Dimagh ko qawi kar ke Quwat-e-Haafza barhata hei.

Agar isko nihar munh pees kar Shehed ke sath mila kar chaat liya jaye to Nissyan yani bhoolne ka marz door ho jata hei.

Kaju mein Magnesium aur Potassium ki bhi kafi ziyada miqdar payi jaati hei, jo Blood Pressure ko normal rakhne mein madadgar hoti hei. Is waja se Khoon ki sharyanein sukadti nahin.

Megnesium dil ke ridham ko mustehkam rakhta hei. Iske ilawa yeh Hadiyon aur Daanton ki mazbooti, Muscels, Aasaab aur Aanton ki sehat ke liye bhi nehayat ehem hei.

Kuch mazeed Kaju ke fayde

Kaju mein Copper, Mangneiz, Phosphorus, Zinc aur Vitamin B bhi paye jaate hein. Isko khane se jism ki thakan door hoti hei. Jabke yeh wazan kam karne mein bhi madadgar hei.

Parhiye Anjeer ke fayde

Kaju Ziabitus yani Sugar ke ilaj mein bhi intehayi mufeed hei. Is mein aise ajza hote hein jinki waja se blood mein shamil Insulin Uzlaat ke khulyon mein jazab ho jati hei. Iske ilawa is mein maujood Potassium ki waja se jism ko Sugar ka level barqarar rakhne mein madad milti hei. Yun jism mein Sugar barhne nahi paati.

Kaju ke fayde aap ko dawat dete hein ke aap is dry fruit ko apni ghiza ka hissa zaroor banaiye.